Oleh : Damar Wulan

Winginane nyong bali nguli pas wayah buka puasa, melu minggir mampir tuku bukaan nang tukang panganan kaki lima dadakan. Aku tuku kolek karo es buah terus njagong nang trotoar jalan Candrabaga, Bekasi Lor.

Suasana lumayan rame, maklum wayah sore wulan puasa ya pada ngabuburit apa priben mbuh, judule akeh wong pada mlaku-mlaku nunggu bedug magrib, tur malem minggu pisan dadi rame gome.

Pas semangkok es buah nembe tek sruput semending, ana ibu-ibu klambine lusuh nggawa bocah loro, kurang lewih umure 8 karo 10 thn.

Marani tukang es buah.
“Mas es piranan semangkok?” ibu muda umuran 35 thn takon.

Trs dijawab nang bakule “sepulu ewu bu.”
“Ngapurane ya mas aku mung duwe sepuluh tok, tapi anaku loro tulung dadekna loro ya, sekarepe arep diwei sepira, buahe diwei pirang pethil terserah sinng peting rasane legi tur adem”.

Bakule jawab iya. “Ya tunggu sedela ya bu?”

Karo nunggu digawekna bocah lanang sing umur 10 thn mlayu, tek delengna marani grobak.

Ya ampun, ternyata nang grobak esih ana bocah balita nongol sirahe sekang jero grobag. Aku mregegel weruh suasana ganjil nang tengah-tengah suka cita wong pada buka puasa, sing kur gari milih panganan sekarepa hati.

Tapi ibu pemulung sing sering diistiahkan “manusia gerobak” (umaeh sekaligus lahan golet rejeki ya mung bermodal gerobak kuwe).

Duh, melasi temen yah gawa anak 3, koh bapake ora ana, arep buka puasa baen duite cupet.

Sedawane agi digawekna es buah ibu sing nganggo jilbab warna coklat, uga mereki tukang kolek grobakan sing wis dibungkusi kabeh.

“Pira sebungkus koleke mas?”
“Limang ewuan bu.”
“ Tuku siji ya mas.”

Bakule manthuk.
Ora ngira tukang kolek ora mung siji awehe, tapi patang bukus.

“ Mas kok akeh temen?”
“Wis gawa bae bu.”

Oh rupane tukang kolek ngerti kondisi si ibu, anak telu karo beyunge iya dadi papat, ngedumel atiku .

Bar sekang tukang kolek, ibu pemulung kuwe gari marani tukang es buah.

Ya kaget, soale ora mung digawekna rong bungkus plastik porsi slim sesuai permintaan merga secupet duite, tapi diwei telung plastik ukuran jombo.

“Mas akeh temen kiye, kebek-kebek maning?”
“Wis digawa bae nganah.”

Tek mat-matna malah tukang es karo tukang kolek pada-pada ora gelem nampani duite si ibu kuwe.

Aku sing urung ngentongna es semangkok terharu ndeleng kebaikan wong-wong cilik sing ngerti kesusahan sepadane.

Puji syukur ya Allah, ternyata crita kebaikan wong nang wulan puasa dina ke 6 esih nambah maning, wong sing kit aku mangan nang sebelahku keton cuek bebek ketungkul srapat-sruput ngrasakna segere es buah, menyat mbayar dimin.

Deweke ndudut duit eketan loro sekang dompet, di dum, go tukang es selembar tukang kolek selembar.

“Mas jujule,” bakul es aweh sepuluhan ewu papat.
“Cekel bae mas, go bayari ibu kae miki,” prentahe.
“Iya tapi esih lewih.”

“Wis cekel bae,” jawabe karo medeki tukang kolek.
“Kiye pak jujule?”
“Cekel bae, go bayari kolek ibu kae miki,” jawabe.

“Iya tapi esih lewih akeh pak?”
“Ya wis cekel bae,”y prentah bapak-bapak sing separo raine berbulu.

Deweke terus mlayu gawa motor matic wis setengah bodol, ndeyan ya bali mengumah. Aku geleng-geleng trenyuh atas kebaikan sing tek weruhi sore kuwe.

Aku arep melu berbuat baik, tapi duite cekak, pulsa bae rong dina urung kober ngisi merga angel didemek duite, hehe. Luar biasa yah tampang awut-awutan malah atine bersih, ngerti susaheh wong liyan.

Nang sisi liyane kadang tampang keren faktane kere, tampang perlente atine dirantai dadi kumed. (***)